Պատրաստում ենք անվտանգության հաջորդ սպրինտը՝ OpenAI-ի պաշտպանությունն ամրապնդելու համար
OpenAI-ում պլանավորում ենք անվտանգության հաջորդ ներքին սպրինտը՝ նոր հետազոտողների ու անվտանգության ոլորտի գործընկերների համախմբելով մեր թիմերի հետ, որպեսզի մեր մոդելների օգնությամբ փորձարկենք և ամրապնդենք մեր համակարգերը։ Մենք համագործակցում ենք Cathedral-ի հետ, որի հետազոտողները մեր թիմերի հետ կօգտագործեն OpenAI-ի մոդելները՝ փորձության ենթարկելու մեր պաշտպանությունը։ Նրանք թույլ կողմերի բացահայտման գործում կներդնեն իրենց յուրահատուկ փորձն ու մոտեցումները և կօգնեն մեզ պաշտպանել մեր հարթակները։
Մենք նաև բարելավում ենք մեր անվտանգության խոցելիությունների հայտնաբերման պարգևատրման ծրագիրը՝ մասնավորապես ավելի քան քառապատկելով կրիտիկական խոցելիությունների հայտնաբերման համար պարգևները։ Մենք ցանկանում ենք, որ հետազոտողները կասկածի տակ դնեն մեր ենթադրությունները և օգնեն ամրապնդել թե՛ մեր համակարգերը, թե՛ դրանց պաշտպանության մեթոդները։
Սա մեր համակարգերի թույլ կողմերը ԱԲ-ի միջոցով շարունակաբար գտնելու և վերացնելու մեր հետևողական աշխատանքի մի մասն է։ Մեր վերջին սպրինտը ցույց տվեց, թե այս մոտեցումն ինչ արդյունքներ կարող է տալ։ Մեր արտադրանքները մշակող ինժեներների 25%-ին ներգրավեցինք մեր համակարգերի թույլ կողմերը գտնելու և վերացնելու աշխատանքներում։ Codex-ի օգնությամբ ինժեներները հետազոտեցին հայտնաբերված խնդիրները, մեկուսացված միջավայրերում վերարտադրեցին խոցելիությունները և վերանայման համար պատրաստեցին ուղղումներ։
Մենք շարունակում և զարգացնում ենք այդ աշխատանքը, քանի որ միայն կիբերպաշտպանության ավանդական միջոցներն այլևս բավարար չեն։ Ոլորտում վերջերս տեղի ունեցած միջադեպերը ցույց են տալիս, թե որքան արագ կարող են սպառնալիքներ ի հայտ գալ, և որքան կարևոր է ստեղծել պաշտպանության շարունակական ցիկլեր՝ թույլ կողմերը գտնելու ու վերացնելու համար, նախքան հարձակվողները կօգտվեն դրանցից։
Պաշտպանվող կողմի հնարավորությունների պատուհանը բաց պահելու համար կազմակերպությունները պետք է կիրառեն առաջադեմ կիբերանվտանգության հնարավորություններ՝ իրենց համակարգերն ամրապնդելու նպատակով։ Մենք օգտագործում ենք մեր ամենահզոր մոդելները՝ մեր սեփական պաշտպանությունն ամրապնդելու համար, և դրանք հասանելի ենք դարձնում Daybreak-ի հաճախորդներին։ Մենք պարտավորվել ենք վեց ամսվա ընթացքում տրամադրել 1 միլիարդ դոլարի սուբսիդավորվող հասանելիություն կիբերպաշտպանության առաջնագծում աշխատող մասնագետներին, որոնք պաշտպանում են կենսական նշանակության ծառայություններն ու թվային ենթակառուցվածքները։ Մենք նաև ներկայացնում ենք վերջին սպրինտի ընթացքում կիրառած մեր ճարտարապետությունն ու քաղած դասերը, ինչպես նաև արդյունաբերության և պետական հատվածի կիբերպաշտպանության մասնագետների կարողություններն ընդլայնելու մեր գործողությունների ծրագիրը։
Մենք կշարունակենք զարգացնել մեր մոդելները, դրանց օգնությամբ ամրապնդել մեր սեփական համակարգերը և ընդլայնել վստահելի կիբերպաշտպանության մասնագետների հասանելիությունը դրանց։ Պաշտպանվող կողմի հնարավորությունների պատուհանը բաց պահելու համար անհրաժեշտ են ողջ ոլորտի գործողությունները, և այդ աշխատանքը պետք է սկսել հիմա։
