Undirbúum næsta öryggisátak til að efla varnir OpenAI

Við hjá OpenAI undirbúum nú næsta innanhússátak í öryggismálum. Þar leiðum við saman nýja rannsakendur, samstarfsaðila á sviði öryggismála og okkar eigin teymi til að prófa og styrkja kerfin okkar með hjálp líkananna okkar. Við erum í samstarfi við Cathedral, en rannsakendur þeirra munu nota líkön OpenAI ásamt teymum okkar til að reyna á varnirnar okkar. Þeir koma með sérhæfða þekkingu og nýjar aðferðir við að finna veikleika og hjálpa okkur að vernda þjónustukerfin okkar.

Við erum einnig að gera umbætur á verðlaunakerfinu okkar fyrir tilkynningar um öryggisgalla, meðal annars með því að meira en fjórfalda verðlaun fyrir uppgötvun alvarlegustu veikleikanna. Við viljum að rannsakendur dragi forsendur okkar í efa og hjálpi okkur að styrkja bæði kerfin okkar og aðferðirnar sem við notum til að verja þau.

Þetta er liður í viðvarandi viðleitni okkar til að nota Ai til að finna og laga veikleika í kerfunum okkar jafnt og þétt. Síðasta átak sýndi hvaða árangri þessi nálgun getur skilað. Við fengum 25% af verkfræðingunum í vöruþróun okkar til að einbeita sér að því að finna og laga veikleika í kerfunum okkar. Með hjálp Codex könnuðu verkfræðingar það sem hafði fundist, endursköpuðu öryggisveikleika í einangruðu umhverfi og undirbjuggu lagfæringar fyrir yfirferð.

Við byggjum áfram á þeirri vinnu því hefðbundnar netvarnir einar og sér duga ekki lengur. Nýleg atvik víðs vegar í greininni sýna hversu hratt ógnir geta komið upp og hversu mikilvægt er að koma á stöðugri hringrás varna til að finna og laga veikleika áður en árásaraðilar nýta sér þá.

Til að viðhalda svigrúmi verjenda þurfa fyrirtæki og stofnanir að nýta háþróaða getu á sviði netöryggis til að styrkja kerfin sín. Við notum öflugustu líkönin okkar til að styrkja eigin varnir og veitum viðskiptavinum Daybreak aðgang að þeim. Við höfum heitið einum milljarði Bandaríkjadala í niðurgreiddan aðgang á sex mánaða tímabili fyrir öryggissérfræðinga í fremstu víglínu sem vernda nauðsynlega þjónustu og stafræna innviði. Við deilum einnig kerfishöguninni og lærdóminum⁠ úr síðasta átaki ásamt áætlun okkar um að efla þau sem sinna netvörnum hjá fyrirtækjum og opinberum aðilum.

Við höldum áfram að þróa líkönin okkar, nota þau til að styrkja eigin kerfi og auka aðgang traustra aðila sem sinna netvörnum. Til að viðhalda svigrúmi verjenda þarf öll greinin að grípa til aðgerða og sú vinna þarf að hefjast núna.