AI-ಸಮರ್ಥ ಪದವೀಧರರನ್ನು ರೂಪಿಸುತ್ತಿರುವ ಆಸ್ಟ್ರೇಲಿಯಾದ ವಿಶ್ವವಿದ್ಯಾಲಯಗಳು

ಇಂದಿನ ವಿದ್ಯಾರ್ಥಿಗಳು ಪದವಿ ಪಡೆಯುವ ಮುನ್ನವೇ ಆಸ್ಟ್ರೇಲಿಯಾದ ಉದ್ಯೋಗ ಕ್ಷೇತ್ರದ ಭವಿಷ್ಯ ರೂಪುಗೊಳ್ಳುತ್ತಿದೆ. ವಿಶ್ವವಿದ್ಯಾಲಯಗಳಾದ್ಯಂತ ವಿದ್ಯಾರ್ಥಿಗಳು ವಿಚಾರಗಳನ್ನು ಅನ್ವೇಷಿಸಲು, ಸಹಾಯಕರನ್ನು ನಿರ್ಮಿಸಲು ಮತ್ತು ಪರಿಕಲ್ಪನೆಗಳನ್ನು ಕಾರ್ಯನಿರ್ವಹಿಸುವ ಪ್ರಾಯೋಗಿಕ ಮಾದರಿಗಳಾಗಿ ರೂಪಿಸಲು AI ಬಳಸುತ್ತಿದ್ದಾರೆ. ಸಂಶೋಧನೆ, ಸ್ಥಾಪಿತ ಉದ್ಯಮಗಳು ಮತ್ತು ತಮ್ಮದೇ ಉದ್ಯಮಗಳಲ್ಲಿ ಬಳಸಲಿರುವ ಕೌಶಲ್ಯಗಳನ್ನು ಅವರು ಈಗಲೇ ಬೆಳೆಸಿಕೊಳ್ಳತೊಡಗಿದ್ದಾರೆ.

ಈ ಬದಲಾವಣೆಯನ್ನು ಗುರುತಿಸಿರುವ ಯುಎನ್‌ಎಸ್‌ಡಬ್ಲ್ಯು ಸಿಡ್ನಿ, ಸಿಡ್ನಿ ವಿಶ್ವವಿದ್ಯಾಲಯ, ಲಾ ಟ್ರೋಬ್ ವಿಶ್ವವಿದ್ಯಾಲಯ ಮತ್ತು ಅಡಿಲೇಡ್ ವಿಶ್ವವಿದ್ಯಾಲಯ ಸೇರಿದಂತೆ ಆಸ್ಟ್ರೇಲಿಯಾದ ವಿಶ್ವವಿದ್ಯಾಲಯಗಳು, ತಮ್ಮ ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಗೆ ಅತ್ಯಾಧುನಿಕ AI ಪರಿಕರಗಳನ್ನು ಒದಗಿಸಲು OpenAI ಜೊತೆ ಸಹಯೋಗ ಬೆಳೆಸುತ್ತಿವೆ.

ವಿದ್ಯಾರ್ಥಿಗಳು, ಶಿಕ್ಷಕರು ಮತ್ತು ಮಾಹಿತಿ ತಂತ್ರಜ್ಞಾನ ತಂಡಗಳು ವೈದ್ಯಕೀಯ ಸನ್ನಿವೇಶಗಳ ಅನುಕರಣೆ, ರೋಬೋಟ್ ನೆರವಿನ ಶಿಕ್ಷಕರ ತರಬೇತಿ ಹಾಗೂ ಉದ್ಯಮ ಕ್ಷೇತ್ರಕ್ಕೆ ದಾರಿ ತೆರೆಯುವ ವಿದ್ಯಾರ್ಥಿ ಯೋಜನೆಗಳಲ್ಲಿ AI ಬಳಸುತ್ತಿವೆ. ಇದರ ಜೊತೆಗೆ, ಕಲಿಕೆ ಮತ್ತು ಮೌಲ್ಯಮಾಪನದಲ್ಲಿ AI ಅನ್ನು ಎಲ್ಲಿ, ಹೇಗೆ ಬಳಸಬಹುದು ಎಂಬುದಕ್ಕೆ ವಿಶ್ವವಿದ್ಯಾಲಯಗಳು ಚೌಕಟ್ಟುಗಳನ್ನು ರೂಪಿಸುತ್ತಿವೆ. ಇದರಿಂದ ವಿದ್ಯಾರ್ಥಿಗಳು ಪ್ರಾಯೋಗಿಕ ಕೌಶಲ್ಯಗಳನ್ನು ಬೆಳೆಸಿಕೊಳ್ಳುವುದರ ಜೊತೆಗೆ ಯಾವಾಗ ತಮ್ಮದೇ ವಿವೇಚನೆಯನ್ನು ಅವಲಂಬಿಸಬೇಕು ಎಂಬುದನ್ನೂ ಅರಿಯುತ್ತಾರೆ. AI ನೆರವಿನ ಕಲಿಕೆಯನ್ನು ರೂಪಿಸುವುದು, AI ಬಳಕೆಯ ಬಗ್ಗೆ ಸ್ಪಷ್ಟ ನಿರೀಕ್ಷೆಗಳನ್ನು ನಿಗದಿಪಡಿಸುವುದು ಮತ್ತು AI ಆಧಾರಿತ ಕೆಲಸದ ವಾತಾವರಣಕ್ಕೆ ಆಸ್ಟ್ರೇಲಿಯನ್ನರನ್ನು ಸಿದ್ಧಗೊಳಿಸುವುದರ ಕುರಿತು ಈ ಉದಾಹರಣೆಗಳು ಶಿಕ್ಷಕರು, ಉದ್ಯೋಗದಾತರು ಮತ್ತು ಉದ್ಯಮ ವೃತ್ತಿಪರರಿಗೆ ಪ್ರಾಯೋಗಿಕ ಪಾಠಗಳನ್ನು ನೀಡುತ್ತವೆ.

OpenAI ಮಾಡಿಸಿದ ಹೊಸ ಸಂಶೋಧನೆ¹, ವಿದ್ಯಾರ್ಥಿಗಳು ತಮ್ಮ ವಿಶ್ವವಿದ್ಯಾಲಯಗಳಿಂದ ಏನನ್ನು ಬಯಸುತ್ತಾರೆ ಎಂಬುದನ್ನು ತಿಳಿಸುತ್ತದೆ. AI ಬಳಕೆಯ ಅವಕಾಶಗಳ ಬಗ್ಗೆ ಅವರ ಹೆಚ್ಚುತ್ತಿರುವ ನಿರೀಕ್ಷೆಗಳೂ ಇದರಲ್ಲಿ ಸೇರಿವೆ. ಆಸ್ಟ್ರೇಲಿಯಾದ 1,000ಕ್ಕೂ ಹೆಚ್ಚು ವಿಶ್ವವಿದ್ಯಾಲಯ ವಿದ್ಯಾರ್ಥಿಗಳ ಸಮೀಕ್ಷೆಯಲ್ಲಿ, 81% ಮಂದಿ ತಾವು ಈಗಾಗಲೇ ವಾರಕ್ಕೆ ಹಲವು ಬಾರಿ AI ಬಳಸುವುದಾಗಿ ಹೇಳಿದ್ದಾರೆ. ದಿನಕ್ಕೆ ಹಲವು ಬಾರಿ ಬಳಸುವ ಸುಮಾರು ಮೂರನೇ ಒಂದು ಭಾಗದಷ್ಟು (33%) ವಿದ್ಯಾರ್ಥಿಗಳೂ ಇವರಲ್ಲಿ ಸೇರಿದ್ದಾರೆ. ಕಾಲು ಭಾಗಕ್ಕಿಂತ ಹೆಚ್ಚು (28%) ವಿದ್ಯಾರ್ಥಿಗಳು ತಮ್ಮ ಅಧ್ಯಯನ, ಕೆಲಸ ಅಥವಾ ವೈಯಕ್ತಿಕ ಜೀವನವನ್ನು ನಿರ್ವಹಿಸಲು ನೆರವಾಗುವ AI ಏಜೆಂಟ್ ಅಥವಾ ಸಹಾಯಕರನ್ನು ಈಗಾಗಲೇ ನಿರ್ಮಿಸಿದ್ದರು. ಐವರಲ್ಲಿ ನಾಲ್ವರು ವಿದ್ಯಾರ್ಥಿಗಳು (79%) ನೈಜ ಜಗತ್ತಿನ ಯೋಜನೆಗಳಲ್ಲಿ ಸುಧಾರಿತ AI ಪರಿಕರಗಳನ್ನು ಬಳಸಲು ತಮ್ಮ ವಿಶ್ವವಿದ್ಯಾಲಯ ಇನ್ನಷ್ಟು ಅವಕಾಶಗಳನ್ನು ನೀಡಬೇಕೆಂದು ಬಯಸುತ್ತಾರೆ. ಅಷ್ಟೇ ಪ್ರಮಾಣದ ವಿದ್ಯಾರ್ಥಿಗಳು ಆರೋಗ್ಯ, ಹವಾಮಾನ, ವಿಜ್ಞಾನ ಅಥವಾ ಸೈಬರ್ ಭದ್ರತೆಯ ಸವಾಲುಗಳಿಗೆ AI ಬಳಸಲು ಆಸಕ್ತಿ ಹೊಂದಿದ್ದಾರೆ.

ಈ ಅನುಭವಗಳನ್ನು ಮುಂದಿನ ಹಂತಕ್ಕೆ ಸಿದ್ಧತೆಯಾಗಿಯೂ ವಿದ್ಯಾರ್ಥಿಗಳು ನೋಡುತ್ತಾರೆ. ಅರವತ್ತು ಪ್ರತಿಶತಕ್ಕಿಂತ ಹೆಚ್ಚು (61%) ವಿದ್ಯಾರ್ಥಿಗಳು ತಾವು ಆಯ್ದ ವೃತ್ತಿಯಲ್ಲಿ ಯಶಸ್ವಿಯಾಗಲು AI ಕೌಶಲ್ಯಗಳು ಅತ್ಯಗತ್ಯವೆಂದು ನಂಬುತ್ತಾರೆ. ಈ ಕೌಶಲ್ಯಗಳು ಜಾಗತಿಕ ಉದ್ಯೋಗ ಕ್ಷೇತ್ರದಲ್ಲಿ ಆಸ್ಟ್ರೇಲಿಯಾದ ಪದವೀಧರರಿಗೆ ಅನುಕೂಲ ಕಲ್ಪಿಸುತ್ತವೆ ಎಂದು 65% ಮಂದಿ ನಂಬುತ್ತಾರೆ. ಉದ್ಯಮ ಆರಂಭಿಸುವ ಮಹತ್ವಾಕಾಂಕ್ಷೆಯೂ ಅವರಲ್ಲಿದೆ. ಸಮೀಕ್ಷೆಯಲ್ಲಿ ಪಾಲ್ಗೊಂಡ ಮುಕ್ಕಾಲು ಭಾಗಕ್ಕಿಂತ ಹೆಚ್ಚು (76%) ವಿದ್ಯಾರ್ಥಿಗಳು ಕಂಪನಿ ಸ್ಥಾಪಿಸಲು ಅಥವಾ ಸ್ವಂತ ಉದ್ಯೋಗ ಮಾಡಲು ಆಸಕ್ತಿ ಇರುವುದಾಗಿ ಹೇಳಿದ್ದಾರೆ. ಮೂರನೇ ಎರಡರಷ್ಟಕ್ಕಿಂತ ಹೆಚ್ಚು (68%) ಮಂದಿ ಉದ್ಯಮ ಆರಂಭಿಸುವುದನ್ನು AI ಸುಲಭಗೊಳಿಸುತ್ತದೆ ಎಂದು ನಂಬಿದ್ದಾರೆ.

ವಿದ್ಯಾರ್ಥಿಗಳ ಈಗಿನ ಅಗತ್ಯಗಳಿಗೆ ಹೇಗೆ ಸ್ಪಂದಿಸಬೇಕು ಎಂಬುದೇ ಉನ್ನತ ಶಿಕ್ಷಣದ ಮುಂದಿರುವ ಪ್ರಶ್ನೆ. ಅವರಿಗೆ ಸುಧಾರಿತ ಪರಿಕರಗಳನ್ನು ಒದಗಿಸುವುದು ಮೊದಲ ಹೆಜ್ಜೆ. ಆದರೆ ಉತ್ತಮ ವಿವೇಚನೆ, ವಿಷಯಜ್ಞಾನ ಮತ್ತು ಪ್ರಾಯೋಗಿಕ ಅನುಭವದೊಂದಿಗೆ ಅವುಗಳನ್ನು ಬಳಸಲು ನೆರವಾಗುವುದೇ ಉದ್ಯೋಗ ಕ್ಷೇತ್ರದಲ್ಲಿ AI ಬಳಸಲು ಅವರನ್ನು ಸಿದ್ಧಗೊಳಿಸುತ್ತದೆ.

OpenAI ಜೊತೆ ಯುಎನ್‌ಎಸ್‌ಡಬ್ಲ್ಯು ವಿಸ್ತರಿಸಿರುವ ಸಹಯೋಗವು ವಿಶ್ವವಿದ್ಯಾಲಯಗಳು ಇದಕ್ಕೆ ಸ್ಪಂದಿಸುತ್ತಿರುವ ಒಂದು ವಿಧಾನವಾಗಿದೆ. ಈ ವಿಶ್ವವಿದ್ಯಾಲಯವು 80,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಗೆ ChatGPT Edu ಒದಗಿಸುತ್ತಿದೆ. ಇಡೀ ವಿದ್ಯಾರ್ಥಿ ಸಮುದಾಯಕ್ಕೆ ಲಭ್ಯವಾಗಿಸುವ ನಿಟ್ಟಿನಲ್ಲಿ ಹಂತ ಹಂತವಾಗಿ ಬಳಕೆಯ ಅವಕಾಶವನ್ನು ವಿಸ್ತರಿಸುತ್ತಿದೆ.

ಯುಎನ್‌ಎಸ್‌ಡಬ್ಲ್ಯು ಮತ್ತು OpenAI ಶೈಕ್ಷಣಿಕ ಕಾರ್ಯಕ್ರಮಗಳು ಹಾಗೂ ಪಠ್ಯಕ್ರಮಗಳಲ್ಲಿ ಸೃಜನಾತ್ಮಕ AI ಮೂಲತತ್ತ್ವಗಳು ಮತ್ತು Codex ಅನ್ನು ಅಳವಡಿಸಲು ಯೋಜಿಸಿವೆ. ವಿದ್ಯಾರ್ಥಿಗಳಿಗೆ ಹ್ಯಾಕಥಾನ್‌ಗಳು ಮತ್ತು ಉದ್ಯಮ ಯೋಜನೆಗಳ ಮೂಲಕ AI ಬಳಸುವ ಅವಕಾಶಗಳೂ ಇರಲಿವೆ. ವಿದ್ಯಾರ್ಥಿಗಳಿಗೆ ವೃತ್ತಿ ತರಬೇತಿ, ಪದವೀಧರರಿಗೆ ಸೂಕ್ತ ಉದ್ಯೋಗಗಳು ಮತ್ತು ನವೋದ್ಯಮ ಸಂಪರ್ಕಜಾಲಗಳೊಂದಿಗೆ ಸಂಪರ್ಕ ಕಲ್ಪಿಸುವುದೂ ಈ ಸಹಯೋಗದ ಉದ್ದೇಶವಾಗಿದೆ.

ಯುಎನ್‌ಎಸ್‌ಡಬ್ಲ್ಯುನ ಮಾಹಿತಿ ತಂತ್ರಜ್ಞಾನ ಸ್ನಾತಕೋತ್ತರ ವಿದ್ಯಾರ್ಥಿ ನಳಿನ್ ಅಯ್ಯರ್ ಉದ್ಯೋಗ ಕ್ಷೇತ್ರದ ಅಗತ್ಯವನ್ನು ಸರಳವಾಗಿ ಹೀಗೆ ವಿವರಿಸಿದರು: “ಉದ್ಯಮ ಕ್ಷೇತ್ರ ಏನನ್ನು ನಿರೀಕ್ಷಿಸುತ್ತದೆ ಮತ್ತು ಅದರಲ್ಲಿ AI ಯಾವ ಪಾತ್ರ ವಹಿಸುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ.”

OpenAI ಜೊತೆ ಸಿಡ್ನಿ ವಿಶ್ವವಿದ್ಯಾಲಯದ ಸಹಯೋಗವೂ ಸಂಸ್ಥೆಯಾದ್ಯಂತ ಪ್ರಾಯೋಗಿಕ ಸಾಮರ್ಥ್ಯವನ್ನು ಬೆಳೆಸುವ ಗುರಿ ಹೊಂದಿದೆ. ಇದು ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿಗೆ ತರಬೇತಿ ಹಾಗೂ ಮಾರ್ಗದರ್ಶನದ ನೆರವಿನೊಂದಿಗೆ ChatGPT Edu ಬಳಕೆಯ ಅವಕಾಶ ಒದಗಿಸಲಿದೆ. ಇದನ್ನು ಹಂತ ಹಂತವಾಗಿ ಜಾರಿಗೊಳಿಸಲಾಗುತ್ತಿದೆ. ಪ್ರಾಯೋಗಿಕ ಪರೀಕ್ಷೆಯ ಬಳಿಕ 2027ರ ಮೊದಲ ಸೆಮಿಸ್ಟರ್‌ನಲ್ಲಿ ಎಲ್ಲ ವಿದ್ಯಾರ್ಥಿಗಳಿಗೆ ಬಳಕೆಯ ಅವಕಾಶ ನೀಡಲು ನಿಗದಿಪಡಿಸಲಾಗಿದೆ. ಸುಸ್ಥಿರತೆಯ ಅಧ್ಯಯನ ಮತ್ತು ಪ್ರಗತಿಗಾಗಿ ವಿಶ್ವವಿದ್ಯಾಲಯವು 10 ಲಕ್ಷ ಡಾಲರ್ ಮೊತ್ತದ AI ಸುಸ್ಥಿರತಾ ಸಂಶೋಧನೆ ಮತ್ತು ನಾವೀನ್ಯತೆ ನಿಧಿಯನ್ನೂ ಸ್ಥಾಪಿಸುತ್ತಿದೆ.

ಲಾ ಟ್ರೋಬ್ ವಿಶ್ವವಿದ್ಯಾಲಯವು AI ಬಳಕೆಯ ಅವಕಾಶಗಳನ್ನು ವ್ಯಾಪಕಗೊಳಿಸುವುದರ ಜೊತೆಗೆ ತನ್ನ ಪಠ್ಯಕ್ರಮದಾದ್ಯಂತ AI ಅಳವಡಿಸುವ ಗುರಿ ಹೊಂದಿದೆ. ಎಲ್ಲ 3,500 ಸಿಬ್ಬಂದಿ ಈಗಾಗಲೇ ChatGPT Edu ಬಳಸುವ ಅವಕಾಶ ಹೊಂದಿದ್ದಾರೆ. 2027ರ ಮೊದಲ ತ್ರೈಮಾಸಿಕದಲ್ಲಿ ಅದರ 45,000 ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ಎಲ್ಲರಿಗೂ ಈ ಅವಕಾಶ ಕಲ್ಪಿಸಲು ಯೋಜಿಸಲಾಗಿದೆ. ಆಸ್ಟ್ರೇಲಿಯಾದ ಮೊದಲ AI ಎಂಜಿನಿಯರಿಂಗ್ ಸ್ನಾತಕ (ಆನರ್ಸ್) ಪದವಿ ಕಾರ್ಯಕ್ರಮವೂ ಈ ಪ್ರಯತ್ನದ ಭಾಗವಾಗಿದ್ದು, 2027ರಲ್ಲಿ ಅದರ ಮೊದಲ ವಿದ್ಯಾರ್ಥಿ ತಂಡ ಪ್ರವೇಶ ಪಡೆಯಲಿದೆ. ಆಸ್ಟ್ರೇಲಿಯಾದ ಮೊದಲ AI ಎಂಬಿಎ ಕಾರ್ಯಕ್ರಮವೂ ಇದರಲ್ಲಿ ಸೇರಿದೆ.

AIಗೆ ಆದ್ಯತೆ ನೀಡುವ ತನ್ನ ಕಾರ್ಯತಂತ್ರದ ಭಾಗವಾಗಿ, ಲಾ ಟ್ರೋಬ್ ಆಸ್ಟ್ರೇಲಿಯಾದ ಮೊದಲ AI ಉಪಕುಲಪತಿ ಮತ್ತು ಮುಖ್ಯ AI ಅಧಿಕಾರಿಯಾಗಿ ಫಿಲ್ ಲಾಫೆನ್‌ಬರ್ಗ್ ಅವರನ್ನು ನೇಮಿಸಿದೆ. ಶಿಕ್ಷಣ, ಸಂಶೋಧನೆ ಮತ್ತು ಕಾರ್ಯಾಚರಣೆಗಳಾದ್ಯಂತ ವಿಶ್ವವಿದ್ಯಾಲಯದ AI ಬಳಕೆಗೆ ಅವರು ಮಾರ್ಗದರ್ಶನ ನೀಡಲಿದ್ದಾರೆ.

ಸಮೀಕ್ಷೆ ಸ್ಪಷ್ಟಪಡಿಸುವ ವಾಸ್ತವಕ್ಕೆ ಈ ಪ್ರಯತ್ನಗಳು ಸ್ಪಂದಿಸುತ್ತವೆ: ವಿದ್ಯಾರ್ಥಿಗಳು ಈಗಾಗಲೇ AI ಪ್ರಯೋಗಗಳಲ್ಲಿ ತೊಡಗಿದ್ದಾರೆ. ಆದರೆ ಸಂಸ್ಥೆಯಾದ್ಯಂತ ಬಳಕೆಯ ಅವಕಾಶ ಮತ್ತು ಬೆಂಬಲ ದೊರೆತರೆ, ಅವರು ಯಾವ ವಿಷಯ ಓದುತ್ತಿದ್ದಾರೆ ಅಥವಾ ಯಾವ ವೈಯಕ್ತಿಕ ಪರಿಕರಗಳನ್ನು ಖರೀದಿಸಬಲ್ಲರು ಎಂಬುದನ್ನು ಲೆಕ್ಕಿಸದೆ ಎಲ್ಲರಿಗೂ ಕೌಶಲ್ಯ ಬೆಳೆಸಿಕೊಳ್ಳಲು ಸಮಾನ ಅವಕಾಶಗಳು ಸಿಗುತ್ತವೆ.

ಲಾ ಟ್ರೋಬ್ ವಿಶ್ವವಿದ್ಯಾಲಯದ ಕೆಲವು ಅತ್ಯಂತ ಆಸಕ್ತಿದಾಯಕ ಪ್ರಯತ್ನಗಳು ಒಂದು ಸರಳ ಪ್ರಶ್ನೆಯಿಂದ ಆರಂಭವಾಗುತ್ತವೆ: ಕಲಿಕೆಯಲ್ಲಿ ಪ್ರಾಯೋಗಿಕ ಅನುಭವವನ್ನು ಹೆಚ್ಚಿಸಲು AI ಅನ್ನು ಹೇಗೆ ಬಳಸಬಹುದು?

ಪ್ಯಾರಾಮೆಡಿಸಿನ್ ಕಾರ್ಯಕ್ರಮದ ಮುಖ್ಯಸ್ಥರಾದ ಡಾ. ಕ್ಯಾಮರನ್ ಆಂಡರ್ಸನ್, ವಿಶ್ವವಿದ್ಯಾಲಯದ ಕಲಿಕಾ ನಿರ್ವಹಣಾ ವ್ಯವಸ್ಥೆಯ ಮೂಲಕ ನೀಡುವ ನಾನಾ ಅಭ್ಯಾಸ ಚಟುವಟಿಕೆಗಳನ್ನು ರೂಪಿಸಲು ChatGPT ಬಳಸುತ್ತಾರೆ. ಈ ಚಟುವಟಿಕೆಗಳಲ್ಲಿ ವಿದ್ಯಾರ್ಥಿಗಳು ಇಸಿಜಿ ಫಲಿತಾಂಶವನ್ನು ಅರ್ಥೈಸುತ್ತಾರೆ, ಹೃದಯಾಘಾತದ ಸಾಧ್ಯತೆಯನ್ನು ಪರಿಶೀಲಿಸುತ್ತಾರೆ ಅಥವಾ ಅನೇಕರಿಗೆ ಗಾಯಗಳಾದ ಘಟನೆಯ ಬಳಿಕ ರೋಗಿಗಳಿಗೆ ಚಿಕಿತ್ಸೆಯ ಆದ್ಯತೆಯನ್ನು ನಿರ್ಧರಿಸುತ್ತಾರೆ. ತರಗತಿಯ ಕಲಿಕೆಯನ್ನು ಬಲಪಡಿಸುವ ಮತ್ತು ಪರೀಕ್ಷಿಸುವ ಅನುಕರಣಾ ಸನ್ನಿವೇಶಗಳನ್ನು ಸೃಷ್ಟಿಸಲು AI ನೆರವಾಗುತ್ತದೆ.

ಲಾ ಟ್ರೋಬ್‌ನ ಶಿಕ್ಷಣ ಶಾಲೆಯಲ್ಲಿ ಸಂಶೋಧನೆ ಮತ್ತು ಉದ್ಯಮ ಸಹಭಾಗಿತ್ವದ ಸಹ ಡೀನ್ ಆಗಿರುವ ಪ್ರಾಧ್ಯಾಪಕಿ ತೆರೆಸ್ ಕೀನ್, ಭಾವಿ ಶಿಕ್ಷಕರು ಪೋಷಕರಿಗೆ ಪ್ರತಿಕ್ರಿಯೆ ನೀಡುವುದನ್ನು ಅಭ್ಯಾಸ ಮಾಡಲು ಫ್ಲೆಚ್ ಎಂಬ ಸಂವಹನಶೀಲ ರೋಬೋಟ್ ಬಳಸುತ್ತಾರೆ. ಮೈಕ್ರೋಸಾಫ್ಟ್ ಅಝೂರ್‌ನಲ್ಲಿ ಹೋಸ್ಟ್ ಮಾಡಲಾದ OpenAI ಬೃಹತ್ ಭಾಷಾ ಮಾದರಿಗಳಿಂದ ಕಾರ್ಯನಿರ್ವಹಿಸುವ ಫ್ಲೆಚ್, ಮಾತು, ಮುಖಭಾವ ಮತ್ತು ತಲೆಯ ಚಲನೆಗಳ ಮೂಲಕ ಪ್ರತಿಕ್ರಿಯಿಸುತ್ತದೆ.

ಅತ್ಯಂತ ಅನುಭವಿ ಶಿಕ್ಷಕರ ಸಂದರ್ಶನಗಳನ್ನು ಆಧರಿಸಿ ಪ್ರಾಧ್ಯಾಪಕಿ ಕೀನ್ ಅವರ ತಂಡವು ನೈಜತೆಗೆ ಹತ್ತಿರವಾದ ಸನ್ನಿವೇಶಗಳನ್ನು ರೂಪಿಸಿತು. ಮುಖ್ಯವಾಗಿ, ಪೋಷಕರೊಂದಿಗಿನ ಮಾತುಕತೆ ಸಂಘರ್ಷಕ್ಕೆ ತಿರುಗುವ ಸನ್ನಿವೇಶಗಳನ್ನು ಎದುರಿಸುವ ಅಭ್ಯಾಸಕ್ಕೆ ಫ್ಲೆಚ್ ಅವಕಾಶ ನೀಡುತ್ತದೆ. ಇದರಿಂದ ಅನೇಕ ಶಿಕ್ಷಕರಿಗೆ ಸವಾಲೆನಿಸುವ ಈ ವಿಚಾರದಲ್ಲಿ ಪ್ರಶಿಕ್ಷಣಾರ್ಥಿ ಶಿಕ್ಷಕರು ಅಗತ್ಯ ಕೌಶಲ್ಯಗಳನ್ನು ಬೆಳೆಸಿಕೊಳ್ಳುತ್ತಾರೆ.

ಲಾ ಟ್ರೋಬ್ ತನ್ನ ಇನ್ನಷ್ಟು ಪಠ್ಯಕ್ರಮಗಳು ಮತ್ತು ಕಾರ್ಯಾಚರಣೆಗಳಲ್ಲಿ AI ಅಳವಡಿಸುತ್ತಿದೆ. OpenAIಯ ಸ್ವಯಂ ಕಾರ್ಯನಿರ್ವಹಿಸುವ ಸಾಧನಗಳಾದ Codex ಮತ್ತು ChatGPT Work ಅನ್ನು ವಿಶ್ವವಿದ್ಯಾಲಯವು ಸಂಸ್ಥೆಯಾದ್ಯಂತ ಲಭ್ಯವಾಗಿಸಿದೆ. ಅದರ ಕೈಪಿಡಿಯಲ್ಲಿ ನವೋದ್ಯಮಗಳಿಗಾಗಿ ವೈಬ್ ಕೋಡಿಂಗ್ ಮತ್ತು ಏಜೆಂಟಿಕ್ AI ತಂತ್ರಾಂಶ ಎಂಜಿನಿಯರಿಂಗ್ (2027ರಿಂದ) ಪಠ್ಯಕ್ರಮಗಳನ್ನು ಪಟ್ಟಿ ಮಾಡಲಾಗಿದೆ.

ವಿಶ್ವವಿದ್ಯಾಲಯದ AI ಉದ್ಯಮ ಕಾರ್ಯಶಾಲೆಯು ಪ್ರಾಯೋಗಿಕ ಕಲಿಕೆಯನ್ನು ಉದ್ಯಮ ಕ್ಷೇತ್ರಕ್ಕೂ ವಿಸ್ತರಿಸುತ್ತದೆ. 2028ರ ವೇಳೆಗೆ ಸಣ್ಣ ಮತ್ತು ಮಧ್ಯಮ ಉದ್ಯಮಗಳು AI ಅಳವಡಿಸಿಕೊಳ್ಳಲು ChatGPT Edu ಮತ್ತು Codex ಮೂಲಕ ನೆರವಾಗುವ ಸಲಹೆಗಾರರು ಹಾಗೂ ಗ್ರಾಹಕರ ಸ್ಥಳದಲ್ಲೇ ಕಾರ್ಯನಿರ್ವಹಿಸುವ ಎಂಜಿನಿಯರ್‌ಗಳಾಗಿ 1,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ಪ್ರಾಯೋಗಿಕ ಅನುಭವ ನೀಡುವುದು ಇದರ ಗುರಿ. ಪದವೀಧರರ ಕೌಶಲ್ಯಗಳನ್ನು ಉದ್ಯಮಗಳ ಅಗತ್ಯಗಳೊಂದಿಗೆ ಬೆಸೆಯುವುದೂ ಇದರ ಉದ್ದೇಶ.

ಈ ಪ್ರಮಾಣದಲ್ಲಿ AI ಅಳವಡಿಸಲು ತೆರೆಮರೆಯಲ್ಲಿ ನಿರಂತರ ಕೆಲಸ ಅಗತ್ಯ. ಡಜನ್‌ಗಟ್ಟಲೆ ನೈಜ ಬಳಕೆಯ ಸಂದರ್ಭಗಳು, ನೂರಾರು ಜನರಿಗೆ ತರಬೇತಿ ಹಾಗೂ ಸಕ್ರಿಯ ಬಳಕೆದಾರರ ಸಂಖ್ಯೆಯಲ್ಲಿ ತಿಂಗಳಿಂದ ತಿಂಗಳಿಗೆ 10% ಬೆಳವಣಿಗೆಯನ್ನು ಲಾ ಟ್ರೋಬ್ ವರದಿ ಮಾಡಿದೆ. ಹೆಚ್ಚು ಜನರು ಭಾಗವಹಿಸಿದಂತೆ, ಸುರಕ್ಷಿತ ಬಳಕೆ ಮತ್ತು ಟೋಕನ್ ಬಳಕೆಯ ವೆಚ್ಚವನ್ನು ಅದು ನಿರ್ವಹಿಸುತ್ತದೆ. “ವ್ಯವಸ್ಥೆಗಳ ಆರಂಭಿಕ ಅಭಿವೃದ್ಧಿ ಮತ್ತು ನಾವೀನ್ಯಕ್ಕೆ ಬೇಕಾಗುವ ಸಮಯವನ್ನು ತಿಂಗಳುಗಳಿಂದ ವಾರಗಳಿಗೆ ಇಳಿಸಲು ChatGPT ಮತ್ತು Codex ನೆರವಾಗಿವೆ. ಮುಖ್ಯವಾಗಿ, ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳು ಒಟ್ಟಾಗಿ ವಿನ್ಯಾಸಗೊಳಿಸುವುದನ್ನು ಪ್ರಕ್ರಿಯೆಯ ಭಾಗವಾಗಿಸಿವೆ,” ಎಂದು ಲಾಫೆನ್‌ಬರ್ಗ್ ಹೇಳಿದರು.

ಸಂಕೀರ್ಣ ವಿಲೀನದ ಮೂಲಕ ಹೊಸದಾಗಿ ಸ್ಥಾಪಿತವಾದ ಅಡಿಲೇಡ್ ವಿಶ್ವವಿದ್ಯಾಲಯಕ್ಕೆ, ಆರಂಭದಿಂದಲೇ ಸುರಕ್ಷಿತ, ಸೂಕ್ತ ಆಡಳಿತಕ್ಕೊಳಪಟ್ಟ ಮತ್ತು ವಿಸ್ತರಿಸಬಹುದಾದ AI ಬಳಕೆಗಳನ್ನು ಅಳವಡಿಸುವ ಅವಕಾಶವಿದೆ. ಒಂದು ತಲೆಮಾರಿನ ಅವಧಿಯಲ್ಲಿ ಆಸ್ಟ್ರೇಲಿಯಾದಲ್ಲಿ ಹೊಸದಾಗಿ ಸ್ಥಾಪನೆಯಾದ ಮೊದಲ ಪ್ರಮುಖ ವಿಶ್ವವಿದ್ಯಾಲಯ ಇದಾಗಿದೆ. ಸಂಶೋಧಕರು, ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ಈಗಾಗಲೇ OpenAIಯ ಎಪಿಐ ಬಳಸುತ್ತಿರುವ ಅನುಭವವನ್ನು ಆಧರಿಸಿ ಇದು ಮುಂದುವರಿಯುತ್ತಿದೆ.

ಅನುಮೋದಿತ ರಕ್ಷಣಾತ್ಮಕ ಸುರಕ್ಷತಾ ಕಾರ್ಯಗಳಿಗೆ OpenAI ಡೇಬ್ರೇಕ್ ಬ್ಲೂ ಬಳಸಿದ ಉನ್ನತ ಶಿಕ್ಷಣ ಕ್ಷೇತ್ರದ ಮೊದಲ ಸಂಸ್ಥೆಗಳಲ್ಲಿ ಅಡಿಲೇಡ್ ವಿಶ್ವವಿದ್ಯಾಲಯವೂ ಒಂದು. ಇದು ದುರ್ಬಲತೆಗಳ ಪತ್ತೆ, ಸುರಕ್ಷತೆಗಾಗಿ ಕೋಡ್ ಪರಿಶೀಲನೆ, ದುರುದ್ದೇಶಪೂರಿತ ತಂತ್ರಾಂಶದ ವಿಶ್ಲೇಷಣೆ, ಸುರಕ್ಷತಾ ಘಟನೆಗಳಿಗೆ ಪ್ರತಿಕ್ರಿಯೆ ಮತ್ತು ತಿದ್ದುಪಡಿಗಳ ದೃಢೀಕರಣ ಸೇರಿದಂತೆ ಸೈಬರ್ ರಕ್ಷಣೆಗೆ ಅತ್ಯಗತ್ಯ ಸಾಮರ್ಥ್ಯ ಒದಗಿಸುತ್ತದೆ.

ವಿದ್ಯಾರ್ಥಿಗಳು ಯಾವಾಗ AI ಬಳಸಬಹುದು ಮತ್ತು ಯಾವಾಗ ತಮ್ಮ ಸ್ವಂತ ಜ್ಞಾನವನ್ನು ಪ್ರದರ್ಶಿಸಬೇಕು ಎಂಬುದರ ಕುರಿತೂ ವಿಶ್ವವಿದ್ಯಾಲಯಗಳು ಸ್ಪಷ್ಟ ನಿರೀಕ್ಷೆಗಳನ್ನು ನಿಗದಿಪಡಿಸುತ್ತಿವೆ.

ಯುಎನ್‌ಎಸ್‌ಡಬ್ಲ್ಯೂ ಮೌಲ್ಯಮಾಪನಕ್ಕಾಗಿ ಬಳಸಬಹುದು, ಬಳಸಬಾರದು, ಬಳಸಲೇಬೇಕು ಎಂಬ ಚೌಕಟ್ಟನ್ನು ಪರಿಚಯಿಸಿದೆ. ಕಲಿಕೆಯ ಗುರಿಯನ್ನು ಅವಲಂಬಿಸಿ, AI ಬಳಕೆಗೆ ಅನುಮತಿ ಇದೆಯೇ, ನಿಷೇಧವಿದೆಯೇ ಅಥವಾ ಅದು ಕಡ್ಡಾಯವೇ ಎಂಬುದನ್ನು ಶಿಕ್ಷಕರು ಸೂಚಿಸಬಹುದು. ಇದು ವಿದ್ಯಾರ್ಥಿಗಳಿಗೆ ತಮ್ಮ ಕ್ಷೇತ್ರಕ್ಕೆ ಅಗತ್ಯವಾದ ಮೂಲಭೂತ ಜ್ಞಾನವನ್ನು ಪ್ರದರ್ಶಿಸುತ್ತಲೇ AI ಅನ್ನು ಸೂಕ್ತವಾಗಿ ಬಳಸುವುದನ್ನು ಅಭ್ಯಾಸ ಮಾಡಲು ಅವಕಾಶ ನೀಡುತ್ತದೆ.

ಸಿಡ್ನಿ ವಿಶ್ವವಿದ್ಯಾಲಯವು AI ಅಳವಡಿಕೆಯ ಜೊತೆಗೆ ಜವಾಬ್ದಾರಿಯುತ AI ಬಳಕೆಯ ಚೌಕಟ್ಟನ್ನೂ ಜಾರಿಗೊಳಿಸುತ್ತಿದೆ. ಅದರ ಮೌಲ್ಯಮಾಪನ ವಿಧಾನವು ವಿದ್ಯಾರ್ಥಿಗಳು ಮೇಲ್ವಿಚಾರಣೆಯಡಿ ತಮ್ಮ ಸ್ವಂತ ಸಾಮರ್ಥ್ಯವನ್ನು ಪ್ರದರ್ಶಿಸುವುದನ್ನು ಖಚಿತಪಡಿಸುತ್ತದೆ. ಬಳಿಕ ಮುಕ್ತ ಮೌಲ್ಯಮಾಪನಗಳಲ್ಲಿ AI ಅನ್ನು ಎಷ್ಟು ಪರಿಣಾಮಕಾರಿಯಾಗಿ ಬಳಸಬಲ್ಲರು ಎಂಬುದನ್ನು ತೋರಿಸಲು ಅವಕಾಶ ನೀಡುತ್ತದೆ.

ಲಾ ಟ್ರೋಬ್ ಪ್ರಾಯೋಗಿಕ ಮಾರ್ಗದರ್ಶನದ ಮೂಲಕವೂ AI ಬಳಕೆಯ ಅವಕಾಶಗಳನ್ನು ವಿಸ್ತರಿಸುತ್ತಿದೆ. ಅದರ ಗ್ರಂಥಾಲಯವು ಎಲ್ಲ ವಿದ್ಯಾರ್ಥಿಗಳಿಗಾಗಿ ಜವಾಬ್ದಾರಿಯುತ ಮತ್ತು ಸುರಕ್ಷಿತ AI ಬಳಕೆಯ ಉಚಿತ ಕಲಿಕಾ ಘಟಕಗಳನ್ನು ರೂಪಿಸಿದೆ. 2027ರ ಮೊದಲ ಸೆಮಿಸ್ಟರ್‌ನಲ್ಲಿ ಪ್ರಥಮ ವರ್ಷದ 50 ಆದ್ಯತೆಯ ವಿಷಯಗಳಲ್ಲಿ AI ಕೌಶಲ್ಯಾಭಿವೃದ್ಧಿಯನ್ನು ಸೇರಿಸಲಾಗುತ್ತಿದೆ. ಶಿಕ್ಷಣ, ಕಾನೂನು ಮತ್ತು ಆರೋಗ್ಯ ಕ್ಷೇತ್ರಗಳಿಗೆ ತಕ್ಕಂತೆ ರೂಪಿಸಿದ ಘಟಕಗಳು AI ಸಾಕ್ಷರತೆಯನ್ನು ವೃತ್ತಿಪರ ಜವಾಬ್ದಾರಿಗಳೊಂದಿಗೆ ಜೋಡಿಸುತ್ತವೆ. ಕಾರ್ಯಾಗಾರಗಳು ಮತ್ತು ಬೋಧನಾ ಸಂಪನ್ಮೂಲಗಳು ಕಲಿಕಾ ಚಟುವಟಿಕೆ ಹಾಗೂ ಮೌಲ್ಯಮಾಪನಗಳನ್ನು ರೂಪಿಸಲು ಶಿಕ್ಷಕರಿಗೆ ನೆರವಾಗುತ್ತವೆ.

ವಿದ್ಯಾರ್ಥಿಗಳು ಈಗಾಗಲೇ AI ಕೌಶಲ್ಯಗಳನ್ನು ತಮ್ಮ ವೃತ್ತಿಜೀವನಕ್ಕೆ ಅತ್ಯಗತ್ಯವೆಂದೂ, ಮುನ್ನಡೆ ಸಾಧಿಸುವ ಅವಕಾಶವೆಂದೂ ನೋಡುತ್ತಿದ್ದಾರೆ. ChatGPT ಬಳಕೆಯ ಅವಕಾಶಗಳನ್ನು ವಿಸ್ತರಿಸಿ, ದೈನಂದಿನ ಬೋಧನೆಯಲ್ಲಿ AI ಅನ್ನು ಅಳವಡಿಸುವ ಮೂಲಕ ಆಸ್ಟ್ರೇಲಿಯಾದ ವಿಶ್ವವಿದ್ಯಾಲಯಗಳು ಆ ಮಹತ್ವಾಕಾಂಕ್ಷೆಯನ್ನು ಪ್ರಾಯೋಗಿಕ ಅನುಭವವಾಗಿ ರೂಪಿಸಲು ನೆರವಾಗುತ್ತಿವೆ. ಕಲಿಯಲು, ಸೃಷ್ಟಿಸಲು ಮತ್ತು ಸಮಸ್ಯೆಗಳನ್ನು ಪರಿಹರಿಸಲು AI ಬಳಸಬಲ್ಲ ಪದವೀಧರರನ್ನು ಸಿದ್ಧಪಡಿಸುವುದು ಇದರ ಗುರಿ. ಅವರು ಉದ್ಯೋಗ ಕ್ಷೇತ್ರಕ್ಕೆ ಕಾಲಿಡುವಾಗ ಆ ಕೌಶಲ್ಯಗಳನ್ನು ಆತ್ಮವಿಶ್ವಾಸದಿಂದ ಬಳಸಲು ಬೇಕಾದ ವಿಷಯಜ್ಞಾನ ಮತ್ತು ವಿವೇಚನೆಯನ್ನೂ ಹೊಂದಿರಬೇಕು.