OpenAI-ஐ வலுப்படுத்த அடுத்த பாதுகாப்புப் பணிக்கட்டத்திற்குத் தயாராகிறோம்

OpenAI-இல் எங்கள் அடுத்த தீவிர பாதுகாப்புப் பணிக்கட்டத்தைத் திட்டமிடுகிறோம். புதிய ஆராய்ச்சியாளர்களையும் பாதுகாப்புக் கூட்டாளர்களையும் எங்கள் குழுக்களுடன் இணைத்து, எங்கள் மாதிரிகளைக் கொண்டு எங்கள் அமைப்புகளைச் சோதித்து வலுப்படுத்தவுள்ளோம். இதற்காக Cathedral உடன் கூட்டுசேர்கிறோம். அதன் ஆராய்ச்சியாளர்கள் எங்கள் குழுக்களுடன் இணைந்து OpenAI மாதிரிகளைப் பயன்படுத்தி எங்கள் பாதுகாப்பு ஏற்பாடுகளைக் கடுமையான சோதனைகளுக்கு உட்படுத்துவார்கள். தங்களின் தனித்துவமான நிபுணத்துவம் மற்றும் அணுகுமுறைகள் மூலம் பலவீனங்களைக் கண்டறிந்து, எங்கள் தளங்களைப் பாதுகாக்க உதவுவார்கள்.

எங்கள் பாதுகாப்புப் பிழைகளைக் கண்டறிவோருக்கான வெகுமதித் திட்டத்திலும் மேம்பாடுகளைச் செய்கிறோம். மிகக் கடுமையான குறைபாடுகளைக் கண்டறிவதற்கான வெகுமதிகளை நான்கு மடங்குக்கும் அதிகமாக உயர்த்துவதும் இதில் அடங்கும். ஆராய்ச்சியாளர்கள் எங்கள் அனுமானங்களைக் கேள்விக்கு உட்படுத்தி, எங்கள் அமைப்புகளையும் அவற்றைப் பாதுகாக்க நாங்கள் பயன்படுத்தும் முறைகளையும் வலுப்படுத்த உதவ வேண்டும் என விரும்புகிறோம்.

செயற்கை நுண்ணறிவைப் பயன்படுத்தி எங்கள் அமைப்புகளில் உள்ள பலவீனங்களைத் தொடர்ந்து கண்டறிந்து சரிசெய்யும் முயற்சியின் ஒரு பகுதி இது. இந்த அணுகுமுறையால் என்ன சாதிக்க முடியும் என்பதை எங்கள் கடந்த பணிக்கட்டம் காட்டியது. எங்கள் தயாரிப்புப் பொறியாளர்களில் 25% பேரை, எங்கள் அமைப்புகளில் உள்ள பலவீனங்களைக் கண்டறிந்து சரிசெய்யும் பணிக்கென ஒதுக்கினோம். Codex உதவியுடன், பொறியாளர்கள் கண்டறியப்பட்ட குறைபாடுகளை ஆராய்ந்தனர்; தனிமைப்படுத்தப்பட்ட சூழல்களில் பாதிப்புகளை மீண்டும் உருவாக்கிச் சோதித்தனர்; மதிப்பாய்வுக்காக மென்பொருள் திருத்தங்களைத் தயாரித்தனர்.

வழக்கமான இணையப் பாதுகாப்பு முறைகள் மட்டுமே இனி போதாது என்பதால், அந்தப் பணியை மேலும் முன்னெடுத்துச் செல்கிறோம். அச்சுறுத்தல்கள் எவ்வளவு விரைவாக உருவாகக்கூடும் என்பதைத் துறை முழுவதும் அண்மையில் நடந்த சம்பவங்கள் காட்டுகின்றன. தாக்குதல் நடத்துவோருக்கு முன்பே பலவீனங்களைக் கண்டறிந்து சரிசெய்ய, தொடர்ச்சியாகச் செயல்படும் பாதுகாப்புச் சுழற்சிகளை உருவாக்குவது எவ்வளவு முக்கியம் என்பதையும் அவை உணர்த்துகின்றன.

பாதுகாப்பாளர்களுக்கான வாய்ப்புக் காலத்தை நீடிக்கச் செய்ய, நிறுவனங்கள் அதிநவீன இணையப் பாதுகாப்புத் திறன்களைப் பயன்படுத்தித் தங்கள் அமைப்புகளை வலுப்படுத்த வேண்டும். எங்கள் பாதுகாப்பை வலுப்படுத்த, எங்களின் மிகத் திறன்வாய்ந்த மாதிரிகளைப் பயன்படுத்துகிறோம். அவற்றை Daybreak வாடிக்கையாளர்களுக்கும் வழங்குகிறோம். அத்தியாவசியச் சேவைகளையும் மின்னிலக்க உள்கட்டமைப்பையும் பாதுகாக்கும் முன்னணிப் பாதுகாப்பாளர்களுக்கு, ஆறு மாதங்களுக்கு மானிய விலையில் அணுகல் வழங்க 1 பில்லியன் அமெரிக்க டாலர் ஒதுக்க உறுதியளித்துள்ளோம். தொழில்துறை மற்றும் அரசுத் துறைகளில் உள்ள இணையப் பாதுகாப்பாளர்களுக்கு வலுவூட்டுவதற்கான எங்கள் செயல்திட்டத்துடன், கடந்த பணிக்கட்டத்தில் பயன்படுத்திய கட்டமைப்பையும் கற்ற பாடங்களையும்⁠ பகிர்கிறோம்.

எங்கள் மாதிரிகளைத் தொடர்ந்து மேம்படுத்தி, அவற்றைக் கொண்டு எங்கள் அமைப்புகளை வலுப்படுத்துவோம். நம்பகமான பாதுகாப்பாளர்களுக்கு அவற்றின் அணுகலையும் விரிவுபடுத்துவோம். பாதுகாப்பாளர்களுக்கான வாய்ப்புக் காலத்தை நீடிக்கச் செய்ய, துறை முழுவதும் நடவடிக்கை எடுக்க வேண்டும். அந்தப் பணி இப்போதே தொடங்க வேண்டும்.