మెరుగైన జవాబులు, విస్తృత ఆలోచన: ChatGPT, విమర్శనాత్మక ఆలోచన శిక్షణ ప్రయోజనాలు

వాస్తవ ప్రపంచానికి సంబంధించిన అసైన్‌మెంట్‌లో విద్యార్థులు ChatGPTని ఉపయోగిస్తే ఏమవుతుంది? నాణ్యత మెరుగుపడితే సృజనాత్మకత తగ్గుతుందా?

OpenAI ఆర్థిక పరిశోధన విభాగం సహకారంతో బొకొనీ విశ్వవిద్యాలయ పరిశోధకులు నిర్వహించిన కొత్త ప్రయోగంలో, ChatGPT సదుపాయం, విమర్శనాత్మక ఆలోచన శిక్షణ వేర్వేరు రకాలుగా పరస్పర అనుబంధ ప్రయోజనాలను అందించినట్లు తేలింది. ChatGPT సదుపాయం విద్యార్థుల పని నాణ్యతను, పొందికను మెరుగుపరిచింది. విమర్శనాత్మక ఆలోచనలో ఒక రూపమైన కారణ సంబంధ రీజనింగ్ అభ్యాసం, మరింత వైవిధ్యమైన ఆలోచనలు రూపొందించేందుకు వారికి తోడ్పడింది. ChatGPT సదుపాయం, శిక్షణ రెండూ పొందిన విద్యార్థుల్లో ఈ రెండు ప్రభావాలూ కనిపించాయి.

విద్యార్థుల పురోగతిని అంచనా వేయడంలో సమగ్ర దృక్పథం ఎంత ముఖ్యమో కూడా ఈ ఫలితాలు తెలియజేస్తున్నాయి. విద్యార్థులు చక్కగా తీర్చిదిద్దిన జవాబులు రూపొందించడాన్ని AI సులభం చేస్తున్నందున, సృజనాత్మకత వంటి ఇతర ఆశించిన లక్షణాలను కొలిచేలా అసైన్‌మెంట్లను మార్చాల్సి రావచ్చు. 

ఈ ప్రయోగంలో బొకొనీ విశ్వవిద్యాలయానికి చెందిన వెయ్యి మందికిపైగా మొదటి సంవత్సరం అండర్‌గ్రాడ్యుయేట్ విద్యార్థులు పాల్గొన్నారు. విశ్వవిద్యాలయ వస్తువుల దుకాణం కోసం మార్కెటింగ్ సిఫార్సులు రూపొందించే వాస్తవ వ్యాపార సందర్భంపై వారు పనిచేశారు.

తరగతి సమయాల ఆధారంగా విద్యార్థులను యాదృచ్ఛికంగా నాలుగు బృందాల్లో ఒకదానికి కేటాయించారు. వారికి ChatGPT (GPT‑4o) సదుపాయం, కారణ సంబంధ రీజనింగ్ శిక్షణ, రెండూ లేదా ఏదీ అందించలేదు. కారణాన్ని ఫలితంతో అనుసంధానించడం, ఒక పరిష్కారం ఎందుకు పనిచేయవచ్చు లేదా పనిచేయకపోవచ్చో వివరించడానికి సంబంధించిన విమర్శనాత్మక ఆలోచనలోని నిర్దిష్ట రూపమే కారణ సంబంధ రీజనింగ్. విద్యార్థులకు అందించిన శిక్షణకు AIతో సంబంధం లేదు. ఆట, ఉదాహరణలు, ప్రశ్నలు, అభిప్రాయ సూచనలు ఉన్న అభ్యాసం ద్వారా కారణ సంబంధ రీజనింగ్ భావనలను వారికి నేర్పించారు. 

శిక్షణ పొందిన మానవ మూల్యాంకనకర్తలు ఐదు పాయింట్ల ప్రమాణపట్టికతో విద్యార్థుల సమర్పణలను అంచనా వేశారు. వేరుగా, ప్రతి సమర్పణలోని ఆలోచనల సంఖ్య, వైవిధ్యం, కారణ సంబంధ రీజనింగ్ సంకేతాలు, ముగ్గురు నిపుణుల సమర్పణలతో ఉన్న సారూప్యతను కొలిచేందుకు పరిశోధకులు స్వయంచాలక పాఠ్య విశ్లేషణను ఉపయోగించారు. 

ChatGPT సదుపాయం పొందిన విద్యార్థులు ఐదు పాయింట్ల స్కేలుపై దాదాపు ఒక పాయింట్ ఎక్కువ సాధించారు. వారి జవాబుల్లో మరిన్ని ఆలోచనలు ఉన్నాయి, తర్కం మరింత స్పష్టంగా ఉంది, నిపుణులు రాసిన సిఫార్సులతో ఎక్కువ సారూప్యత కనిపించింది. మరోలా చెప్పాలంటే, కొత్తగా నేర్చుకుంటున్నవారు మరింత వృత్తిపరంగా కనిపించే పని రూపొందించేందుకు AI తోడ్పడింది. ముఖ్యంగా, విద్యార్థులు తమ అసైన్‌మెంట్లను పూర్తిగా ChatGPTకి అప్పగించలేదు. ఏమి అడగాలి, వచ్చిన జవాబులను ఎలా అంచనా వేయాలి, తుది సమర్పణలో వేటిని చేర్చాలి అనేవి వారే నిర్ణయించాల్సి వచ్చింది. 

విమర్శనాత్మక ఆలోచన అభ్యాసం మరింత అనూహ్యమైన ఫలితాన్ని ఇచ్చింది. అభ్యాసాన్ని పూర్తి చేసిన విద్యార్థులు తమ ఆలోచనలు ఎందుకు పనిచేయవచ్చు, ఎప్పుడు విఫలం కావచ్చు అనే విషయాలను మరింత స్పష్టంగా వివరించారు. అయితే మూల్యాంకన ప్రమాణపట్టికలో వారికి ఎక్కువ మార్కులు రాలేదు. విశ్వవిద్యాలయ దుకాణంపై అవగాహన, వినియోగం పెంచడం అనే రెండు ప్రామాణిక మార్కెటింగ్ లక్ష్యాలను సిఫార్సులు ఎంత బాగా నెరవేర్చాయనే విషయాన్నే అది కొలిచింది.

ప్రమాణపట్టిక గుర్తించని మరో ప్రయోజనాన్ని పాఠ్య విశ్లేషణ వెల్లడించింది. అభ్యాసాన్ని పూర్తి చేసిన విద్యార్థులు బృందం మొత్తంలో విస్తృత శ్రేణి ఆలోచనలను రూపొందించారు. తోటి విద్యార్థుల ఆలోచనలతో పోల్చినప్పుడు అవి మరింత ప్రత్యేకంగా ఉన్నాయి. ఈ ప్రయోగంలో విద్యార్థులను అంచనా వేయడానికి ఉపయోగించినటువంటి సంప్రదాయ ప్రమాణపట్టిక, స్పష్టంగా, చక్కని నిర్మాణంతో ఉన్న జవాబుకు గుర్తింపు ఇవ్వగలదు. కానీ మరెవరూ ఆలోచించని ఆలోచనను విద్యార్థి రూపొందించాడా అనే విషయాన్ని విస్మరించవచ్చు. అందుకే ఇది ముఖ్యం.

విద్యార్థులు సొంతంగా ఆలోచించడం నేర్చుకోవాలా లేదా AIను ఉపయోగించడం నేర్చుకోవాలా అనే రెండు ఎంపికల మధ్య చర్చగా విద్యపై వాదనను చూడాలనిపించవచ్చు.

రెండూ వేర్వేరు విధాలుగా విలువైనవేనని ఈ ప్రయోగం స్పష్టం చేస్తోంది. చక్కగా తీర్చిదిద్దిన, ఎక్కువ ఆలోచనలతో కూడిన, తార్కికంగా మరింత పొందికైన జవాబులను రూపొందించేందుకు AI సదుపాయం విద్యార్థులకు తోడ్పడింది. విస్తృత శ్రేణిలో సృజనాత్మక ఆలోచనలు రూపొందించడానికి, ఊహలను ప్రశ్నించడానికి, తమ ఆలోచనలు ఎందుకు పనిచేస్తాయో వివరించడానికి విమర్శనాత్మక ఆలోచన శిక్షణ వారిని ప్రోత్సహించింది.

రెండూ కలిసి పరస్పర అనుబంధంగా పనిచేస్తాయి. 

ChatGPT సదుపాయం, విమర్శనాత్మక ఆలోచన అభ్యాసం రెండూ పొందిన విద్యార్థుల్లో వాటిలో ఒక్కోదాని ప్రయోజనాలు కనిపించాయి. వారి ఆలోచనల్లోని వైవిధ్యం, అభ్యాసాన్ని మాత్రమే పూర్తి చేసిన విద్యార్థుల స్థాయిలో ఉంది. వారి ప్రమాణపట్టిక మార్కులు, ఆలోచనల సంఖ్య ChatGPT సదుపాయం మాత్రమే పొందిన విద్యార్థుల స్థాయిలో ఉన్నాయి. వారి పనిలో మరింత బలమైన తార్కిక పొందికతో పాటు, వివరణలు వెతకడం, ఊహలను ప్రశ్నించడం వంటి లక్షణాలు ఎక్కువగా కనిపించాయి. మొత్తంగా, అత్యధిక రకాల కొలమానాల్లో ఈ బృందం పురోగతి చూపింది. 

ప్రయోగంలో యాదృచ్ఛిక కేటాయింపు పద్ధతిని ఉపయోగించడం వల్ల పరిశోధకులు ఈ విభిన్న అంశాలను లోతుగా పరిశీలించగలిగారు. ChatGPT సదుపాయం, విమర్శనాత్మక ఆలోచన అభ్యాసం విడివిడిగా చూపిన ప్రభావాలను, వాటిని కలిపినప్పుడు వచ్చిన ప్రభావం నుంచి వేరు చేయగలిగారు. విద్యార్థులపై AI ప్రభావం, వారి అభ్యాసానికి ఉత్తమ నిర్మాణం, మద్దతు ఎలా అందించాలనే అంశాలపై వేగంగా విస్తరిస్తున్న పరిశోధనలకు ఈ ప్రయోగం ప్రత్యేకంగా ఉపయోగకరమైన తోడ్పాటునందిస్తోంది. 

విద్యార్థులపై అభ్యాసం చూపిన ప్రభావానికి, సంప్రదాయ ప్రమాణపట్టిక గుర్తించిన అంశాలకు మధ్య ఉన్న తేడా, పాఠశాలలు ఎదుర్కొంటున్న విస్తృత సవాలును సూచిస్తోంది. 

చక్కగా తీర్చిదిద్దిన, నిపుణుల పనిలా కనిపించే పనిని రూపొందించేందుకు విద్యార్థులకు AI తోడ్పడగలిగితే, తుది జవాబును మాత్రమే చూడటం వల్ల విద్యార్థికి నిజంగా ఎంత అర్థమైందో పూర్తిగా తెలియదు. 

అసైన్‌మెంట్లు, మూల్యాంకనాలు మారాల్సి రావచ్చనే పరిణామాన్ని ఇప్పటికే ఎంతోమంది విద్యావేత్తలు ఎదుర్కొంటున్నారు. ఆధునిక సమాజంలో విద్యార్థులకు అవసరమైన నైపుణ్యాలకు మద్దతివ్వడానికి సాంకేతికత, విద్య అనేక దశాబ్దాలుగా కలిసి అభివృద్ధి చెందుతున్న ధోరణిలో ఇదీ భాగమే.

అత్యంత సంప్రదాయబద్ధమైన లేదా చక్కగా తీర్చిదిద్దిన జవాబులకు మాత్రమే కాకుండా, సృజనాత్మకత, రీజనింగ్, అనేక విధానాల పరిశీలనను ప్రతిబింబించే పనిని రూపొందించినందుకు విద్యార్థులను గుర్తించడం ఎంత ముఖ్యమో ఈ ఫలితాలు తెలియజేస్తున్నాయి. 

ముఖ్యాంశం: విద్యార్థులు తమ జవాబులను మెరుగుపరచుకోవడానికి AI తోడ్పడింది. వారి ఆలోచనలను మరింత విస్తృతం చేసుకోవడానికి విమర్శనాత్మక ఆలోచన శిక్షణ తోడ్పడింది. భవిష్యత్తుకు విద్యార్థులను సిద్ధం చేయడంలో ఈ రెండూ పరస్పర అనుబంధ పాత్రలు పోషిస్తాయి.